ലിവർപൂളിൽ നടത്തപ്പെട്ട പുറത്തു നമസ്കാര ശുശ്രൂഷയിൽ ക്നാനായ കാത്തലിക് മിഷൻസ് യുകെയിൽ പുതുതായി ശുശ്രൂഷ ചെയ്യാനെത്തിയ നവ വൈദികരെ മിഷൻസ് ഡയറക്ടർ ഫാ. സുനി പടിഞ്ഞാറേക്കര പൊതുവായി പരിചയപ്പെടുത്തുകയും സ്വാഗതം അരുളുകയും ചെയ്തു. ഫാ. എൽബിൻ തിരുനെല്ലിപറമ്പിൽ, ഫാ. ടോം പുത്തൻപുരയ്ക്കൽ എന്നിവരാണ് പുതുതായി ശുശ്രൂഷ ചെയ്യാൻ എത്തിയ വൈദികർ.
ഫാ. എൽബിൻ തിരുനെല്ലിപ്പറമ്പിൽ പാലത്തുരുത്ത് ഇടവക തിരുനെല്ലിപറമ്പിൽ തോമസ് (പരേതൻ) – എൽസമ്മ ദമ്പതികളുടെ മകനാണ്. കോട്ടയം അതിരൂപത മൈനർ സെമിനാരിയിലും ആലുവ മേജർ സെമിനാരിയിലും പഠനം പൂർത്തിയാക്കിയ ഫാ. എൽബിൻ 2022 ഡിസംബർ 31ന് അഭിവന്ദ്യ മാർ മാത്യു മൂലക്കാട്ട് പിതാവിന്റെ കൈവെയ്പ്പ് ശുശ്രൂഷ വഴി പൗരോഹിത്യം സ്വീകരിച്ചു. തുടർന്ന് ഉഴവൂർ ഫൊറോനാ പള്ളി അസിസ്റ്റൻറ് വികാരിയായും അറയങ്ങാട്, പോത്തുകുഴി ഇടവകകളിലെ വികാർ-ഇൻ-ചാർജായും സേവനം അനുഷ്ഠിച്ചതിന് ശേഷമാണ് യുകെയിലേക്ക് എത്തിയത്.
കാരിത്താസ് ഇടവക പുത്തൻപുരയ്ക്കൽ ജോർജ് മോളി ദമ്പതികളുടെ മകനാണ് ഫാ. ടോം. കോട്ടയം അതിരൂപത MSP മൈനർ സെമിനാരിയിൽ പഠനം പൂർത്തിയാക്കിയതിനു ശേഷം ഫിലോസഫി ഉജ്ജയിനിൽ നിന്നും തിയോളജി വടവാതൂർ സെമിനാരിൽ നിന്നും പഠനം പൂർത്തിയാക്കി. 2023 ജനുവരി രണ്ടിന് അഭിവന്ദ്യ മാർ മാത്യു മൂലക്കാട്ട് പിതാവിന്റെ കൈവെയ്പ്പ് ശുശ്രൂഷ വഴി പൗരോഹിത്യം സ്വീകരിച്ചു. ഗുജറാത്തിലെ രാജ്കോട്ട് ക്രൈസ്റ്റ് ഹോസ്പിറ്റലിലെ അസിസ്റ്റൻറ് ഡയറക്ടറായും, പുന്നത്തറ, തൊടുപുഴ ചുങ്കം എന്ന ഇടവകകളിൽ അസിസ്റ്റൻറ് വികാരിയായും, കാനം വയലിൽ ഇടവകയുടെ വികാരിയായും സേവനം അനുഷ്ഠിച്ചതിന് ശേഷമാണ് ഫാ. ടോം പുത്തൻപുരയ്ക്കൽ യുകെയിലേക്ക് എത്തിയത്.
