ധൂപക്കുറ്റി ; സവിശേഷതകൾ

നമ്മുക്കെല്ലാം പരിചിതമായ ഒരു ദേവാലയ ഉപകരണമാണ് ധൂപക്കുറ്റി. അപ്പോസ്തോലിക സഭകളുടെ എല്ലാ ശുശ്രൂഷകളിലും ഒഴിച്ചുകൂടാൻ ആവാത്ത ഒന്നാണ് ധൂപം. കർത്താവിന്റെ ആലയത്തിലെ ധൂപാർപ്പണം വിശുദ്ധ ഗ്രന്ഥത്തിൽ അനേകം തവണ പ്രതിപാദിക്കുന്നു. ഇസ്രയേലിന്റെ പ്രധാനപുരോഹിതനായ അഹറോനോട് കർത്താവിന്റെ ആലയത്തിൽ ധൂപാർപ്പണം നടത്തുവാൻ ദൈവം കൽപ്പിക്കുന്നത് ലേവ്യ പുസ്തകത്തിൽ നാം വായിക്കുന്നുണ്ട്. സ്നാപക യോഹന്നാന്റെ ജനനത്തെക്കുറിച്ചുള്ള അറിയിപ്പ് സഖറിയാ പുരോഹിതന് ലഭിക്കുന്നത് അദ്ദേഹം ദേവാലയത്തിൽ ധൂപം അർപ്പിക്കുന്ന സമയത്താണ്. ധൂപക്കുറ്റിയെ സഭയായും അതിൽ നിന്ന് ഉയരുന്ന ധൂപം സഭയുടെ ആരാധന സ്വർഗത്തിലേക്ക് ഉയരുന്നതായും അർത്ഥമാക്കുന്നു. ധൂപക്കുറ്റിയുടെ താഴത്തെ തട്ട് ഭൂമിയുടെയും മുകൾത്തട്ട് സ്വർഗ്ഗത്തിന്റെയും പ്രതീകമാണ്. മനുഷ്യന്റെ പാപങ്ങളെ സൂചിപ്പിക്കുന്ന കരിയെ പരിശുദ്ധാത്മാവാകുന്ന അഗ്നി ശുദ്ധീകരിച്ചു കനലുകളായി രൂപാന്തരപ്പെടുന്നു. ധൂപക്കുറ്റിയുടെ നാല് ചങ്ങലകളിൽ വശങ്ങളിൽ ഉള്ള 3 ചങ്ങലകൾ പിതാവിനേയും പുത്രനെയും പരിശുദ്ധാത്മാവിനെയും നടുവിൽ ഉള്ള ചങ്ങല പരിശുദ്ധ ത്രിത്വത്തിന്റെയും പ്രതീകമാണ്. അതോടൊപ്പം നാല് ചങ്ങലകൾ നാല് സുവിശേഷങ്ങളെയും സൂചിപ്പിക്കുന്നു. ചങ്ങലകളിൽ ഉള്ള പന്ത്രണ്ട് മണികൾ പന്ത്രണ്ട് അപ്പോസ്തോലന്മാരെ ഓർമിപ്പിക്കുന്നു. ഈ ചങ്ങലകളുടെ എഴുപത്തിരണ്ട് കണ്ണികൾ 72 സുവിശേഷ പ്രസംഗകരെ സൂചിപ്പിക്കുന്നു. ധൂപക്കുറ്റി പരിശുദ്ധ ദൈവമാതാവിനെയും അഗ്നിഅമ്മയുടെ ഉദരത്തിൽ വസിച്ച ദൈവത്തെയും സൂചിപ്പിക്കുന്നു. സുറിയാനി പാരമ്പര്യത്തിൽ പ്രധാനകാർമ്മികനെ നമ്മുടെ കർത്താവിനോടും മദ്ബഹയിൽ ധൂപം വീശുന്ന പ്രധാന ശുശ്രൂഷിയെ കർത്താവിനു വഴിയൊരുക്കിയ സ്നാപക യോഹന്നാനോടും ഉപമിക്കുന്നു.