ക്നാനായ കാത്തലിക് മിഷൻസ് യുകെയുടെ നേതൃത്വത്തിൽ നടത്തപ്പെട്ട നാലാമത് പുറത്തു നമസ്കാരം ഭക്തിസാന്ദ്രമായി സമാപിച്ചു. യുകെയുടെ വിവിധ ദേശങ്ങളിൽ നിന്നായി അനേകം ഭക്തജനങ്ങൾ വിശ്വാസപൂർവ്വം തിരുകർമ്മങ്ങളിൽ പങ്കുചേർന്നു. ക്നാനായ കാത്തലിക് മിഷൻസ് യുകെയിൽ സേവനമനുഷ്ഠിക്കുന്ന എല്ലാ വൈദികരും ദിവ്യബലിയിലും പുറത്തു നമസ്കാര ശുശ്രൂഷയിലും പങ്കുചേർന്നു.
മനോഹരമായ അലങ്കരിച്ച ക്നാനായക്കാരുടെ സ്വന്തം ഇടവക ദൈവാലയത്തിൽ രാവിലെ കൃത്യം പത്തുമണിക്ക് ആരാധന ആരംഭിച്ചു. തുടർന്ന് തിരുവസ്ത്രങ്ങൾ അണിഞ്ഞ് വൈദികർ പ്രദിക്ഷണമായി അൾത്താരയെ നമിച്ചു ദിവ്യബലിയിലേക്ക് പ്രവേശിച്ചു. മതബോധന കമ്മീഷൻ ചെയർമാൻ ഫാ. ഷഞ്ചു കൊച്ചു പറമ്പിൽ ആയിരുന്നു മുഖ്യ കാർമികൻ.
ക്നാനായ കാത്തലിക് മിഷൻസ് ഡയറക്ടർ ഫാ. സുനി പടിഞ്ഞാറേക്കര, ഫാ. സജി തോട്ടം, ഫാ. മാത്യൂസ് വലിയ പുത്തൻപുര, ഫാ. ജോസ് തേക്ക്നിൽക്കുന്നതിൽ, ഫാ. ജിൻസ് കണ്ടക്കാട്, ഫാ. ജിബിൻ പാറടിയിൽ, ഫാ. അജൂബ് തോട്ടനാനിയിൽ, ഫാ. എൽബിൻ തിരുനെല്ലിക്കുന്നേൽ, ഫാ. ടോം പുത്തൻപുരയ്ക്കൽ എന്നിവർ സഹ കാർമികരായിരുന്നു.
പുറത്തു നമസ്കാരത്തിൻറെ ഏറ്റവും പ്രധാനപ്പെട്ട ഘടകമാണ് ഗായകസംഘം. ടോമി പടപ്പുരക്കലിന്റെ നേതൃത്വത്തിൽ യുവജനങ്ങളും മുതിർന്നവരും ചേർന്ന് സംഘഗാനം ലൈവ് ഓർക്കിസ്ട്ര ആയി നടത്തപ്പെട്ടു. ഹൃദ്യവും മനോഹരമായ ഗാനങ്ങൾ മനസ്സിനെ ആർദ്രമാക്കി.
വിശുദ്ധ കുർബാനയ്ക്ക് ശേഷം ഫാ. സുനി പടിഞ്ഞാറേക്കര പുറത്തു നമസ്കാരത്തിന് നേതൃത്വം നൽകി.
15 ക്നാനായ മിഷനുകളിൽ നിന്നുമായി ഏകദേശം 500-ലധികം ആളുകളാണ് പുറത്തു നമസ്കാരത്തിന് എത്തിച്ചേർന്നത്. ഭക്തിസാന്ദ്രമായ ചടങ്ങുകൾ ഭയഭക്തി ബഹുമാനത്തോടെ ഏവരും പങ്കുചേരുകയും തിരുക്കർമ്മങ്ങൾക്ക് ശേഷം കടുത്തുരുത്തി മുത്തിയമ്മയുടെ തിരുസ്വരൂപം വണങ്ങി നേർച്ചകൾ അർപ്പിക്കുകയും ചെയ്തു.
സ്നേഹ വിരുന്നോടെ സമാപിച്ച പുറത്ത് നമസ്കാരം അടുത്തവർഷം വീണ്ടും കാണാം എന്ന വിശ്വാസത്തിൽ ഭക്തജനങ്ങൾ അനുഗ്രഹം പ്രാപിച്ച് വീടുകളിലേക്ക് മടങ്ങി.
