ലണ്ടൻ: യുകെയിലെ ക്നാനായ മിഷനുകളെ ഏകോപിപ്പിച്ചുകൊണ്ട് ആദ്യമായി സംഘടിപ്പിക്കുന്ന ദേശീയതല കലോത്സവം ‘തെക്കൻസ് ഫെസ്റ്റ് 2026’-ന്റെ ആദ്യഘട്ട ഒരുക്കങ്ങൾ പൂർത്തിയായി. മിഷൻ, നാഷണൽ കോർഡിനേറ്റർമാരുടെ പ്രഥമ ഓൺലൈൻ യോഗത്തിൽ മത്സരക്രമങ്ങൾ സംബന്ധിച്ച സുപ്രധാന തീരുമാനങ്ങൾ എടുത്തു.
നമ്മുടെ തനതായ പാരമ്പര്യങ്ങളും ആചാരങ്ങളും പുതുതലമുറയ്ക്ക് കൈമാറുന്നതിനുള്ള വലിയൊരു വേദിയായി ഈ കലോത്സവം മാറും. പ്രവാസലോകത്ത് വളരുന്ന യുവതലമുറയ്ക്ക് ക്നാനായ സംസ്കാരത്തിന്റെ വേരുകൾ തിരിച്ചറിയാനും, വരുംതലമുറകളിലേക്ക് ഈ പൈതൃകം അഭിമാനപൂർവ്വം പകർന്നുനൽകാനും ഇത്തരം ഒത്തുചേരലുകൾ അനിവാര്യമാണ്. നമ്മുടെ സമുദായത്തിന്റെ തനിമ നിലനിർത്തുന്നതിനും ഐക്യം ദൃഢമാക്കുന്നതിനും ‘തെക്കൻസ് ഫെസ്റ്റ് 2026’ ഒരു വലിയ ചുവടുവെപ്പായിരിക്കും.
കലോത്സവ വിവരങ്ങൾ:
തീയതി: 2026 ഏപ്രിൽ 18, ശനിയാഴ്ച
വേദി: ബിഷപ്പ് മിൽനർ കാത്തലിക് കോളേജ്, ഡഡ്ലി (Bishop Milner Catholic College, Dudley, DY1 3BY)
കൂടുതൽ വിവരങ്ങൾക്കും രജിസ്ട്രേഷനും നിങ്ങളുടെ മിഷൻ കോർഡിനേറ്റർമാരുമായി (Mission Coordinators) ഉടൻ ബന്ധപ്പെടുക. യുകെയിലെ ക്നാനായ പൈതൃകം ആഘോഷമാക്കാൻ ഒരുങ്ങുന്ന ഈ കലോത്സവത്തിനായി വലിയ ആവേശത്തോടെയാണ് മിഷനുകൾ കാത്തിരിക്കുന്നത്.
