വാഴ്വ് 2026: ഒരുക്കങ്ങൾ അന്തിമഘട്ടത്തിലേക്ക്.
ബർമിംഗ്ഹാം: യുകെയിലെ 15 ക്നാനായ കത്തോലിക്കാ മിഷനുകളിലെ കുടുംബങ്ങളെ ഒരുമിച്ച് അണിനിരത്തി സെപ്റ്റംബർ 26-ന് ബർമിംഗ്ഹാമിലെ ബഥേൽ കൺവെൻഷൻ സെന്ററിൽ അരങ്ങേറുന്ന ‘വാഴ്വ് 2026’-ന്റെ ഒരുക്കങ്ങൾ സജീവമായി പുരോഗമിക്കുന്നു. വിവിധ കമ്മിറ്റികളുടെ നേതൃത്വത്തിൽ വിപുലമായ മുന്നൊരുക്കങ്ങളാണ് നടക്കുന്നത്.
വിശ്വാസത്തിന്റെയും കുടുംബകൂട്ടായ്മയുടെയും ക്നാനായ പാരമ്പര്യത്തിന്റെയും കലാ-സാംസ്കാരിക വൈവിധ്യത്തിന്റെയും മഹത്തായ സംഗമമായി വാഴ്വ് 2026-നെ മാറ്റുകയെന്ന ലക്ഷ്യത്തോടെയാണ് വിവിധ കമ്മിറ്റികൾ പ്രവർത്തിക്കുന്നത്. വൈദികരുടെ ആത്മീയ നേതൃത്വത്തിൽ ചുമതലകൾ ഏറ്റെടുത്ത കമ്മിറ്റികൾ കൃത്യമായ ആസൂത്രണത്തോടെയും കൂട്ടായ പ്രവർത്തനത്തിലൂടെയും ഒരുക്കങ്ങൾ മുന്നോട്ട് കൊണ്ടുപോകുന്നു.
നിശ്ചിത ഇടവേളകളിൽ യോഗങ്ങൾ ചേർന്ന് പ്രവർത്തനങ്ങൾ വിലയിരുത്തുകയും ഓരോ മേഖലയിലെയും പുരോഗതി പരിശോധിക്കുകയും ചെയ്യുന്നുണ്ട്. പരിപാടിയുടെ വിജയകരമായ നടത്തിപ്പിനാവശ്യമായ ക്രമീകരണങ്ങൾ വിവിധ തലങ്ങളിൽ പുരോഗമിക്കുകയാണ്.
കലാപരിപാടികൾക്കും പൊതുസമ്മേളനത്തിനും വിപുലമായ ഒരുക്കങ്ങൾ
വാഴ്വ് 2026-ലെ പ്രധാന പരിപാടികളായ കൾച്ചറൽ പ്രോഗ്രാംസിന്റെയും പൊതുസമ്മേളനത്തിന്റെയും ഏകോപനച്ചുമതല ഫാ. അജൂബ് തൊട്ടനാനിയിൽ, ഷാജി ചരമേൽ, ഷെറി ബേബി, ബിന്ദു ജോം മാക്കിൽ എന്നിവർ കോ-ഓർഡിനേറ്റർമാരായി നിർവഹിക്കുന്നു. വിവിധ മേഖലകളിൽ പ്രാഗൽഭ്യം തെളിയിച്ച നിരവധി പേരാണ് കമ്മിറ്റിയിൽ അംഗങ്ങളായി പ്രവർത്തിക്കുന്നത്. പരിപാടികൾ മികവുറ്റതാക്കുന്നതിനുള്ള ആസൂത്രണങ്ങളും പരിശീലനങ്ങളും ഏകോപനപ്രവർത്തനങ്ങളും സജീവമായി നടക്കുന്നു.
ഭക്ഷണവിതരണത്തിനും കൃത്യമായ ക്രമീകരണം
വാഴ്വിൽ പങ്കെടുക്കുന്ന കുടുംബങ്ങൾക്ക് മികച്ച ഭക്ഷണസൗകര്യം ഒരുക്കുന്നതിനുള്ള ചുമതല ഫുഡ് കമ്മിറ്റിക്കാണ്. ഫാ. ജിൻസ് കണ്ടക്കാട്, ജിഷു ജോൺ, ജിജോ കോരപ്പള്ളി എന്നിവർ കോ-ഓർഡിനേറ്റർമാരായി പ്രവർത്തിക്കുന്ന കമ്മിറ്റി, ഭക്ഷണവിതരണവുമായി ബന്ധപ്പെട്ട വിവിധ പ്രവർത്തനങ്ങൾ ഏകോപിപ്പിക്കുന്നതിനൊപ്പം വോളണ്ടിയർമാർക്ക് ആവശ്യമായ മാർഗനിർദേശങ്ങളും നൽകിവരുന്നു.
പൊന്തിഫിക്കൽ കുർബാനയ്ക്ക് ഗായകസംഘം ഒരുങ്ങുന്നു
വാഴ്വ് 2026-ന്റെ പ്രധാന ആകർഷണങ്ങളിലൊന്നായ പൊന്തിഫിക്കൽ കുർബാനയുടെ ഗായകസംഘത്തിന്റെ ഒരുക്കങ്ങൾക്കും പ്രത്യേക പ്രാധാന്യമാണ് നൽകുന്നത്. ഫാ. ജിബിൻ പാറടിയിൽ, ടോമി പടപ്പുരക്കൽ, ജിഷ മാത്യു എന്നിവർ കൊയർ കമ്മിറ്റിയുടെ നേതൃത്വം വഹിക്കുന്നു. ഇവരോടൊപ്പം യുകെയിലെ വിവിധ ക്നാനായ മിഷനുകളിൽ നിന്നുള്ള പതിനേഴോളം ഗായകർ പ്രവർത്തനങ്ങളിൽ പങ്കാളികളാകുന്നു.
വാഴ്വിന്റെ വാർത്തകളും വിശേഷങ്ങളും ജനങ്ങളിലേക്ക്
വാഴ്വ് 2026-ന്റെ വിവരങ്ങളും പരിപാടിയുടെ വിശേഷങ്ങളും പൊതുജനങ്ങളിലേക്ക് സമയബന്ധിതമായി എത്തിക്കുന്നതിൽ പബ്ലിസിറ്റി കമ്മിറ്റിയും നിർണായക പങ്കാണ് വഹിക്കുന്നത്. ഫാ. ടോം പുത്തൻപുരയ്ക്കൽ, ജോജോ മേലേടം, എബി നെടുവാമ്പുഴ എന്നിവർ കോ-ഓർഡിനേറ്റർമാരായി പ്രവർത്തിക്കുന്ന കമ്മിറ്റിയാണ് വാഴ്വിന്റെ ഔദ്യോഗിക പ്രഖ്യാപനം മുതൽ പരിപാടിയുമായി ബന്ധപ്പെട്ട വാർത്തകളും വിശേഷങ്ങളും പ്രചാരണ പ്രവർത്തനങ്ങളും ഏകോപിപ്പിക്കുന്നത്. സോഷ്യൽ മീഡിയ, വിവിധ മാധ്യമങ്ങൾ, പ്രമോഷൻ പ്രവർത്തനങ്ങൾ തുടങ്ങിയവയിലൂടെ വാഴ്വ് 2026-ന്റെ സന്ദേശവും പരിപാടിയുടെ വിവരങ്ങളും പരമാവധി ആളുകളിലേക്ക് എത്തിക്കാനുള്ള പ്രവർത്തനങ്ങളാണ് കമ്മിറ്റി നടത്തുന്നത്. കോ-ഓർഡിനേറ്റർമാർക്കൊപ്പം സക്കറിയ പുത്തൻകളം, ബിജു പന്നിവേലിൽ, ലിജു കരുപ്ലാക്കിൽ, ബിബു പൂവള്ളിമഠത്തിൽ, ബിനോയി മങ്കോട്ടിൽ, ഡിവിൻ ഡോമി, സാജൻ പഠിക്കമാലിൽ എന്നിവർ പബ്ലിസിറ്റി കമ്മിറ്റിയിൽ പ്രവർത്തിക്കുന്നു.
പ്രാർത്ഥനയുടെ ആത്മീയചൈതന്യം, കുടുംബങ്ങളുടെ സ്നേഹസംഗമം, ക്നാനായ പാരമ്പര്യത്തിന്റെ പ്രൗഢി, കലാ-സാംസ്കാരിക വൈവിധ്യം, കൂട്ടായ്മയുടെ ആനന്ദം എന്നിവ ഒരേ വേദിയിൽ സമന്വയിക്കുന്ന അനുഗ്രഹീത ദിനമാക്കി വാഴ്വ് 2026-നെ മാറ്റാനുള്ള ശ്രമത്തിലാണ് സംഘാടകർ. യുകെയിലെ ക്നാനായ കത്തോലിക്കാ കുടുംബങ്ങളുടെ വിശ്വാസബന്ധങ്ങളും കുടുംബഐക്യവും സമൂഹസ്നേഹവും കൂടുതൽ ദൃഢമാക്കുന്ന ഈ മഹാസംഗമം, പങ്കെടുക്കുന്ന ഓരോ കുടുംബത്തിനും മറക്കാനാവാത്ത ആത്മീയവും സാംസ്കാരികവുമായ അനുഭവമായി മാറുമെന്ന പ്രതീക്ഷയിലാണ് സംഘാടകർ.
