Category: Knanaya Mission UK News

ക്നാനായ കാത്തലിക് മിഷൻസ് യുകെയുടെ നേതൃത്വത്തിൽ കുട്ടികൾക്കും യുവജനങ്ങൾക്കും മുതിർന്നവർക്കും അവരുടെ കലാപരമായ കഴിവുകൾ പ്രകടിപ്പിക്കാനും മിഷനുകൾ തമ്മിലുള്ള പരസ്പര സഹകരണം ശക്തിപ്പെടുത്താനും സഹായിക്കുന്ന ക്നാനായ കലോത്സവം – തെക്കൻ ഫെസ്റ്റ് 2026 ഏപ്രിൽ 18-ന് നടത്തപ്പെടുന്നു. ബെർമിങ്ഹാമിലെ Dudley Bishop Milner College-ൽ സംഘടിപ്പിക്കുന്ന ഈ കലോത്സവം ക്നാനായ കത്തോലിക്ക വിശ്വാസികളുടെ സാംസ്കാരിക സംഗമമായി മാറും .

മത്സരങ്ങൾ മിഷനുകളുടെയും മാസ്സ് സെൻററുകളുടെയും അടിസ്ഥാനത്തിൽ ആയിരിക്കും നടത്തപ്പെടുക. ഓരോ മത്സരാർത്ഥിക്കും പരമാവധി രണ്ട് വ്യക്തിഗത ഇനങ്ങളിലും മൂന്ന് ഗ്രൂപ്പ് ഇനങ്ങളിലും പങ്കെടുക്കാം. പൊതുവായ മത്സര ഇനങ്ങളിൽ പ്രായമോ ലിംഗഭേദമോ ഇല്ലാതെ എല്ലാവർക്കും പങ്കെടുക്കാനുള്ള അവസരം ഒരുക്കിയിട്ടുണ്ട്.

ഓരോ വ്യക്തിഗത ഇനത്തിലും ഒരു മിഷൻ/മാസ്സ് സെന്ററിൽ നിന്ന് പരമാവധി രണ്ട് മത്സരാർത്ഥികൾക്ക് മാത്രമേ പങ്കെടുക്കാൻ സാധിക്കൂ. അതുപോലെ ഓരോ ഗ്രൂപ്പ് ഇനത്തിലും ഒരു മിഷൻ/മാസ്സ് സെൻററിൽ നിന്ന് ഒരു ടീമിന് മാത്രം പങ്കെടുക്കാം. നിരവധി സിംഗിൾ, ഗ്രൂപ്പ് കലാമത്സരങ്ങൾ ഉൾപ്പെടുത്തിയിരിക്കുന്നതിനാൽ പങ്കെടുക്കുന്നവർക്ക് വൈവിധ്യമാർന്ന അവസരങ്ങളാണ് ഒരുക്കിയിരിക്കുന്നത്. മത്സരങ്ങളുടെ വിശദമായ നിയമാവലികളും വിവരങ്ങളും കലോത്സവ മാർഗ്ഗനിർദ്ദേശ പട്ടികയിൽ ലഭ്യമാണ്.

ക്നാനായ കാത്തലിക് മിഷൻസ് യുകെയുടെ നേതൃത്വത്തിൽ ആദ്യമായാണ് ഈ കലോത്സവം സംഘടിപ്പിക്കുന്നത്. ഈസ്റ്റർ അവധിക്കാലം പരിശീലനത്തിനും തയ്യാറെടുപ്പിനും അനുകൂലമാകുന്നത് പങ്കെടുക്കുന്നവർക്ക് ഗുണകരമാണ്. ഏപ്രിൽ 18-ന് കലോത്സവം മികച്ച രീതിയിൽ നടത്തുന്നതിനായി ഫാ. ഷഞ്ജു കൊച്ചുപറമ്പിൽ, ബെന്നി മാവേലിൽ, സോജൻ മുകളേൽ വടക്കേതിൽ, ഷെറി ബേബി, മേബിൾ അനു എന്നിവർ കോർഡിനേറ്റർസ് ആയ കമ്മിറ്റി സജീവമായി പ്രവർത്തിച്ചുവരുന്നു.

“Thekkans Fest” – Official Title for Knanaya Kalolsavam 2026

Hearty congratulations to Philip Pathiyil of the Holy Kings Knanaya Catholic Proposed Mission, Three Counties, for suggesting “Thekkans Fest” as the official title for the upcoming Knanaya Kalolsavam 2026, scheduled to be held on 18 April 2026 in Birmingham.

Your thoughtful and creative contribution adds a unique identity to this grand cultural celebration. Once again, congratulations, Philip Pathiyil, and thank you for being part of this memorable initiative.

പ്രമുഖ വചനപ്രഘോഷകയായ സിസ്റ്റർ ആൻ മരിയ SH നയിക്കുന്ന ഏകദിന ബൈബിൾ കൺവെൻഷൻ ലിവർപൂളിലെ നമ്മുടെ ക്നാനായ കത്തോലിക്കാ ദേവാലയത്തിൽ വച്ച് 2026 മാർച്ച് 7, ശനിയാഴ്ച നടത്തപ്പെടുകയാണ്. ഈ ബൈബിൾ കൺവെൻഷനിൽ മുതിർന്നവർക്കും കുട്ടികൾക്കും പ്രത്യേകം പ്രത്യേകം ശുശ്രൂഷകൾ ഉണ്ടായിരിക്കുന്നതാണ്.

ദൈവം അവിടുത്തെ വചനത്തിലൂടെ ചൊരിയുന്ന അനുഗ്രങ്ങൾ പ്രാപിക്കുവാനും, ഈ വരുന്ന വലിയ നോമ്പിൽ നമ്മുടെ കുടുംബങ്ങളെ ആത്മീയമായി വളർത്തുവാനും എല്ലാവരെയും ഈ ബൈബിൾ കൺവെൻഷനിലേക്ക് സ്നേഹപൂർവ്വം ക്ഷണിക്കുന്നു.

സീറോ മലബാർ പാരമ്പര്യത്തിൽ വലിയനോമ്പിന്റെ ആരംഭം അടയാളപ്പെടുത്തുന്ന ദിനമാണ് വിഭൂതി തിങ്കൾ. വിശ്വാസികൾ ശിരസ്സിൽ ചാരം പൂശി വിനയത്തോടും അനുതാപത്തോടും കൂടി ആത്മീയ പുതുക്കലിലേക്കുള്ള യാത്ര ആരംഭിക്കുന്ന ദിനമാണിത്. ഉപവാസത്തിനായി നിശ്ചയിക്കപ്പെട്ടിരിക്കുന്ന ഈ ദിവസം, ദൈവസന്നിധിയിലേക്കുള്ള കൂടുതൽ അടുപ്പത്തിനായി നമ്മെ ക്ഷണിക്കുന്നു.

“പേതൃത്താ” ഞായറിന്‍റെ പിറ്റേ ദിവസമായ തിങ്കളാഴ്ചയാണ് പൗരസ്ത്യ പാരമ്പര്യം അനുസരിച്ച് നോമ്പ് ആരംഭിക്കുന്നത്. വിഭൂതി തിങ്കൾ, കരിക്കുറി തിരുനാൾ, കുരിശുവര പെരുനാൾ എന്നിങ്ങനെ വിവിധ പേരുകളിൽ അറിയപ്പെടുന്ന ഈ ആചരണം മനുഷ്യജീവിതത്തിന്റെ നിസ്സാരതയും ദൈവകൃപയിലുള്ള ആശ്രയത്വവും നമ്മെ ഓർമ്മപ്പെടുത്തുന്നു. കഴിഞ്ഞ വർഷത്തെ ഓശാന ഞായറാഴ്‌ച ആശീർവദിച്ച കുരുത്തോല കത്തിച്ചുണ്ടാക്കുന്ന ചാരമാണ് നെറ്റിയിൽ പൂശുന്നത്. അഗ്നിയിൽ കത്തിയ കുരുത്തോലപോലെ ദൈവസ്‌നേഹത്തിന്റെ അഗ്നിയാൽ നമ്മളും ആകർഷിതരായി ഉപവാസത്തിന്റെയും പ്രാർത്ഥനയുടെയും വഴിയിലൂടെ ആത്മീയ പരിവർത്തനത്തിലേക്കു നയിക്കപ്പെടണമെന്ന് ഈ അടയാളം നമ്മെ ഓർമ്മിപ്പിക്കുന്നു.

ഓരോ വിഭൂതി തിരുനാളും നമ്മെ ഒരു വലിയ സത്യത്തിലേക്ക് നയിക്കുന്നു — ഈ ലോകത്തിൽ ഒന്നും സ്ഥിരമല്ല. ജീവിതത്തിലെ സന്തോഷങ്ങളും ദുഃഖങ്ങളും സമ്പത്തുകളും എല്ലാം നശ്വരമാണ്. മനുഷ്യൻ ഒടുവിൽ ശൂന്യകയ്യോടെ മടങ്ങേണ്ടവനാണ്; നമ്മുടെ യഥാർത്ഥ പൗരത്വം സ്വർഗ്ഗത്തിലാണ്. ജീവിതത്തിലെ എല്ലാ അനുഭവങ്ങളും താൽക്കാലികമാണെന്ന് നോമ്പുകാലം നമ്മെ ഓർമ്മിപ്പിക്കുന്നു. തിരുവചനം പറയുന്നു: “മനുഷ്യാ, നീ മണ്ണാകുന്നു; മണ്ണിലേക്കുതന്നെ നീ മടങ്ങും.”

നെറ്റിയിൽ വരയ്ക്കുന്ന ചാരക്കുരിശ് യേശുവിലേക്കുള്ള വഴിയെ കണ്ടെത്താൻ നമ്മെ സഹായിക്കുന്ന ഒരു അടയാളമാണ്. ലോകബന്ധങ്ങൾ ശാശ്വതമല്ലെന്നും ഒടുവിൽ യേശുവിലേക്കാണ് നാം മടങ്ങേണ്ടതെന്നും അത് ഓർമ്മപ്പെടുത്തുന്നു. മനസ്താപത്തോടും എളിമയോടും ഉപവാസത്തോടും പ്രാർത്ഥനയോടും കൂടി ദൈവത്തോടൊത്തു ജീവിക്കാനുള്ള ക്ഷണമാണ് ഈ തിരുനാൾ.

നോമ്പുകാലത്തിലേക്കു കടക്കുമ്പോൾ അതിന്റെ യഥാർത്ഥ ചൈതന്യം മറക്കാതിരിക്കാം. ദൈവത്തോടൊപ്പം വസിക്കാനുള്ള സമയമാണ് ഇത്. ചെയ്തുപോയ തെറ്റുകളെക്കുറിച്ച് മനസ്തപിക്കാനും പൂർണ്ണഹൃദയത്തോടെ ദൈവത്തിലേക്കു മടങ്ങിവരാനും ഉള്ള അവസരമാണ് ഇത്. ലോകത്തിന്റെ ബന്ധങ്ങളിൽ നിന്ന് വിട്ടുനിൽക്കുകയും പ്രാർത്ഥനയിലൂടെ ദൈവസന്നിധിയിൽ തുടരുകയും ചെയ്യുക എന്നതാണ് നോമ്പിന്റെ ആത്മാവ്.

അനുതാപം എന്നത് ദൈവസാന്നിധ്യത്തിൽ കൂടെയിരുന്നു “ചൂടുപിടിക്കുക” എന്നതുപോലെയാണ്. മോശയ്ക്കു മുള്‍പടര്‍പ്പിൽ പ്രത്യക്ഷപ്പെട്ടതും അപ്പസ്തോലന്മാരുടെമേൽ അഗ്നിനാവായി വന്നതുമായ ദൈവസാന്നിധ്യത്തിൽ തുടരുമ്പോൾ നമ്മുടെ ഉള്ളിലെ പാപത്തിന്റെ അശുദ്ധി ഉരുകിനശിക്കുകയും ആദിമ പരിശുദ്ധി വീണ്ടെടുക്കപ്പെടുകയും ചെയ്യും.

ഈ വലിയനോമ്പുകാലം എല്ലാവർക്കും അനുഗ്രഹപ്രദവും ആത്മീയ പുതുക്കലിനും കാരണമാകട്ടെ.

കത്തോലിക്കാ സഭയിലെ ഏറ്റവും പ്രധാനപ്പെട്ട ഘടകമാണ് മതബോധന ഡിപ്പാർട്ട്മെൻറ്. സന്മാർഗ ജീവിതവും ബൈബിൾ അധിഷ്ഠിതമായ ജീവിതവും സഭാ ജീവിതവും ചെറുപ്പം മുതലേ മനസ്സിലാക്കി കൊടുക്കുവാനും സഭാ സമുദായ സ്നേഹത്തിൽ വളർന്നുവരുവാനും ഉപകരിക്കുന്ന വേദപാഠം 15 ക്നാനായ മിഷനുകളിലും വിശുദ്ധ കുർബാന സെൻററുകളിലും ഭംഗിയായി നടത്തപ്പെടുന്നു. മതബോധന കമ്മീഷൻ ചെയർമാൻ ഫാദർ ഷഞ്ചു കൊച്ചുപറമ്പിലിന്റെ നേതൃത്വത്തിൽ 15 ക്നാനായ കാത്തലിക് മിഷനുകളിലെയും ഹെഡ് ടീച്ചർമാരെ ഈ ലക്കം തെക്കൻ ടൈംസ് പരിചയപ്പെടുത്തുന്നു.

കോട്ടയം അതിരൂപതക്കും ക്നാനായ സമുദായത്തിനും അഭിമാനമായി മാർ മാത്യു മൂലക്കാട്ട് പിതാവ്. അഖിലേന്ത്യ മെത്രാൻ സമിതിയുടെ ഭരണസമിതിയിൽ എത്തുന്ന ആദ്യത്തെ ക്നാനായ കത്തോലിക്ക മെത്രാനാണ് അഭിവന്ദ്യ മാർ മാത്യു മൂലക്കാട്ട് പിതാവ്. സീറോ മലബാർ സഭയുടെ പെർമനന്റ് സിനഡ് മെമ്പറായ അഭിവന്ദ്യ മൂലക്കാട്ട് പിതാവ് സീറോ മലബാർ സഭയുടെ സീനിയർ മെത്രാപ്പോലീത്തയാണ്. സഭാതലത്തിൽ വിവിധ മേഖലകളിൽ സുത്യർഹമായ സേവനം അനുഷ്ഠിച്ച മാർ മാത്യു മൂലക്കാട്ട് പിതാവ് തൻറെ മേഖലകളിൽ പ്രാവീണ്യം തെളിയിച്ച വ്യക്തിത്വം കൂടിയാണ്.

ദൈവശാസ്ത്രത്തിലും സഭാ ശാസ്ത്രത്തിലും വളരെയധികം വിജ്ഞാനം ഉള്ള മാർ മാത്യു മൂലക്കാട്ട് പിതാവ് സീറോ മലബാർ സഭയുടെ ബെനഡിക്ടൻ സന്യാസ വ്രതം സ്വീകരിച്ച മെത്രാപ്പോലീത്തയും കൂടിയാണ്.

അഭിവന്ദ്യ മൂലക്കാട്ട് പിതാവിൻറെ അഖിലേന്ത്യാ തലത്തിലുള്ള ഈ ഉന്നതസ്ഥാനത്തിന് ക്നാനായ സമുദായ മക്കൾ ആനന്ദിക്കുന്നതിനോടൊപ്പം പിതാവിൻറെ പ്രവർത്തനങ്ങൾക്ക് ശക്തിയും ഊർജ്ജവും ലഭിക്കുവാൻ പ്രാർത്ഥിക്കുകയും വലിയ പിതാവിന് യുകെ ക്നാനായ കാത്തലിക് മിഷൻ അംഗങ്ങളുടെ ആശംസകൾ!

ക്നാനായ കാത്തലിക് മിഷൻസ് യുകെയുടെ ഔദ്യോഗിക മുഖപത്രമായ തെക്കൻ ടൈംസ് പ്രവർത്തനമാരംഭിച്ചത് 2024 ഡിസംബർ മുതലാണ്.

ഫാ. സുനി പടിഞ്ഞാറേക്കര മാനേജിംഗ് ഡയറക്ടർ ആയും ഫാ. മാത്യൂസ് വലിയ പുത്തൻപുര ചീഫ് എഡിറ്ററായും പ്രവർത്തിക്കുന്ന തെക്കൻ ടൈംസ് 2026-ലെ വർണ്ണ കലണ്ടർ പ്രസിദ്ധീകരിക്കുന്നു. അനുദിന വിശുദ്ധർ , വിരുദ്ധ കുർബാന, ബൈബിൾ വായന വിവരങ്ങൾ, ക്നാനായ കാത്തലിക് മിഷൻസ് യുകെയുടെ പരിപാടികളുടെ വിവരങ്ങൾ, ഇടവക തിരുനാളുകളുടെ വിവരങ്ങൾ, പ്രീ മാരേജ് ക്ലാസുകളുടെ വിവരങ്ങൾ, എല്ലാ ക്നാനായ കാത്തലിക് മിഷൻസ് വികാരിമാരുടെയും കൈക്കാരന്മാരുടെയും വിവരങ്ങൾ എന്നിങ്ങനെ നിരവധിയായ ഉപകാരപ്രദമായ വിശേഷങ്ങൾ അടങ്ങിയ കലണ്ടർ ആണ് പ്രസിദ്ധീകരിക്കുന്നത്. ക്രിസ്തുമസ്സിനോടനുബന്ധിച്ചു മിഷനുകളിൽ നിന്നും മാസ്സ് സെന്ററുകളിൽ നിന്നും കലണ്ടർ ലഭ്യമാകും.

ഉന്നത നിലവാരത്തിലുള്ള പേപ്പറിൽ ബഹുവർണ്ണ കലണ്ടർ ഓരോ ക്നാനായ കത്തോലിക്ക വിശ്വാസികൾക്കും ഉപകാരപ്രദമാകും.

യു.കെ.യിലെ ക്നാനായ കത്തോലിക്കാ മിഷൻസ് UK (Knanaya Catholic Missions UK), മീഡിയ കമ്മീഷൻ മുഖേന 2025 നവംബർ 27-ന് പുറത്തിറക്കിയ ഈ വിശദീകരണക്കുറിപ്പ്, മിഷൻ രജിസ്ട്രേഷൻ ഫോം സംബന്ധിച്ച് സമുദായാംഗങ്ങൾക്കിടയിൽ നിലനിന്നിരുന്ന ആശങ്കകൾ പരിഹരിക്കുന്നതിനും, UKKCA (UK Knanaya Catholic Association) യുമായി നടന്ന ചർച്ചകളുടെ നിജസ്ഥിതി ബോധ്യപ്പെടുത്തുന്നതിനും വേണ്ടിയുള്ളതാണ്.

🤝 UKKCA യുമായി നടന്ന ചർച്ചകൾ

• തുടക്കം: ഗ്രേറ്റ് ബ്രിട്ടൺ സീറോ മലബാർ രൂപതയുടെ കീഴിൽ സ്ഥാപിച്ച ക്നാനായ കത്തോലിക്കാ മിഷനുകളിലെ രജിസ്ട്രേഷൻ ഫോം സംബന്ധിച്ച് ചിലർക്കുണ്ടായിരുന്ന ആശങ്കകൾ പരിഹരിക്കുന്നതിനായി മിഷൻ അധികാരികളും UKKCA നേതൃത്വവുമായി നിരവധി ചർച്ചകൾ നടത്തി.
• ആദ്യ ഫോം അംഗീകാരം (2021): ആവശ്യമായ ഭേദഗതികൾ വരുത്തി പരസ്പരം അംഗീകരിച്ച മിഷൻ രജിസ്ട്രേഷൻ ഫോം (FN-013A) 2021 സെപ്റ്റംബർ 11-ന് സംയുക്ത പ്രസ്താവനയിലൂടെ പ്രസിദ്ധപ്പെടുത്തി. നിലവിൽ ഉപയോഗത്തിലുള്ളത് ഈ ഫോം തന്നെയാണ്.
• കോട്ടയം അതിരൂപതാംഗത്വ പ്രശ്നം (2023): 2023 ഏപ്രിൽ 3-ന് നടന്ന ചർച്ചയിൽ, നിലവിലെ ഫോം പൂരിപ്പിച്ചു നൽകിയാൽ കോട്ടയം അതിരൂപതാംഗത്വം നഷ്ടപ്പെടില്ലെന്ന് കോട്ടയം അതിരൂപതാധ്യക്ഷൻ രൂപതയുടെ ലെറ്റർ ഹെഡിൽ എഴുതി നൽകിയാൽ അംഗീകരിക്കാമെന്ന് UKKCA സമ്മതിച്ചിരുന്നു. എന്നാൽ അപ്രകാരമുള്ള കത്ത് ലഭിച്ചിട്ടും UKKCA പിന്നീട് അതിൽ നിന്ന് പിന്തിരിയുകയാണുണ്ടായത്.
• തുടർ ചർച്ചകൾ (2024-2025): അടിസ്ഥാനരഹിതമായ ആശങ്കകൾ സമുദായാംഗങ്ങളിൽ ഉടലെടുത്ത സാഹചര്യത്തിൽ, 2024 ഡിസംബർ 14-ന് ചേർന്ന മിഷൻ വൈദികരുടെയും പ്രതിനിധികളുടെയും യോഗം ചർച്ചകൾക്കായി ഒരു കമ്മിറ്റിയെ ചുമതലപ്പെടുത്തി.
  • ഈ കമ്മിറ്റിയും UKKCA യും തമ്മിൽ 2025 ജൂൺ 17-ന് മാഞ്ചസ്റ്ററിൽ വെച്ച് മുഖാമുഖം ചർച്ച നടത്തുകയും, UKKCA തയ്യാറാക്കിക്കൊണ്ടുവന്ന പുതിയ ഫോമിൽ മാറ്റങ്ങൾ വരുത്താൻ തീരുമാനിക്കുകയും ചെയ്തു.
  • ഭേദഗതി വരുത്തിയ ഫോം അംഗീകാരത്തിനായി മാർ ജോസഫ് സ്രാമ്പിക്കൽ പിതാവിനെ കാണാൻ തീരുമാനിച്ചെങ്കിലും, UKKCA-യുടെ തിരക്കുകൾ കാരണം കൂടിക്കാഴ്ചയ്ക്ക് കാലതാമസം ആവശ്യപ്പെട്ടു.
  • 2025 ഒക്ടോബർ16-ന് വീണ്ടും ഓൺലൈൻ മീറ്റിംഗ് നടത്തുകയും, തിരുത്തിയ ഫോം അംഗീകാരത്തിനായി മിഷൻ കോർഡിനേറ്റർ ഫാ. സുനി പടിഞ്ഞാറേക്കര മാർ ജോസഫ് സ്രാമ്പിക്കൽ പിതാവിന് അയച്ചുകൊടുക്കുകയും ചെയ്തു.

🛡️ കോട്ടയം അതിരൂപതാംഗത്വത്തെക്കുറിച്ചുള്ള വ്യക്തത

• മാർ മാത്യു മൂലക്കാട്ട് മെത്രാപ്പോലീത്തായുടെ സർക്കുലർ (302/2023): കോട്ടയം അതിരൂപതാംഗത്വം സംബന്ധിച്ച ആശങ്കകൾ പരിഹരിക്കുന്നതിനായി മാർ മാത്യു മൂലക്കാട്ട് മെത്രാപ്പോലീത്ത 2023 ജൂലൈ 20-ന് സർക്കുലർ 302/2023 പുറത്തിറക്കി. അതിരൂപതയുടെ അധികാരപരിധിക്ക് പുറത്തുള്ള ക്നാനായക്കാർ തങ്ങളുടെ മാതൃഇടവകാംഗത്വം നിലനിർത്തുന്നതിന്, അതത് സ്ഥലങ്ങളിൽ സഭ നൽകിയിരിക്കുന്ന ക്നാനായ അജപാലന സംവിധാനങ്ങൾ പ്രയോജനപ്പെടുത്തണം എന്ന് ഈ സർക്കുലർ വ്യക്തമാക്കുന്നു.
• മാർ ജോസഫ് സ്രാമ്പിക്കൽ പിതാവിന്റെ സർക്കുലർ (07/2025): മാർ ജോസഫ് പണ്ടാരശ്ശേരിൽ പിതാവ് UK സന്ദർശിച്ച സാഹചര്യത്തിൽ, ഗ്രേറ്റ് ബ്രിട്ടൺ സീറോ മലബാർ രൂപതാധ്യക്ഷൻ മാർ ജോസഫ് സ്രാമ്പിക്കൽ പിതാവ് പ്രത്യേക താൽപര്യമെടുത്ത് 2025 ഒക്ടോബർ 7-ന് സർക്കുലർ 07/2025 പുറപ്പെടുവിച്ചു.
  • യു.കെ.യിലെ ക്നാനായ കാത്തലിക് മിഷനുകളിൽ അംഗമാകുന്നതിലൂടെ ക്നാനായക്കാരുടെ കോട്ടയം അതിരൂപതാംഗത്വം നഷ്ടപ്പെടുകയില്ല എന്ന് ഈ സർക്കുലർ വ്യക്തമാക്കുന്നു. ഈ സർക്കുലർ കാനോനിക നിയമമനുസരിച്ച് സാധുതയുള്ള Particular Law ആയി നിലവിൽ വന്നിട്ടുള്ളതാണ്.
  • ഇതിലൂടെ ക്നാനായ സമുദായാംഗങ്ങളുടെ ആശങ്കയ്ക്ക് ആധികാരികവും പ്രാമാണികവുമായ പരിഹാരം സാധ്യമായി.

📍 മിഷൻ വൈദികരുടെ കർത്തവ്യം

• യു.കെ. ക്നാനായ മിഷൻ വൈദികർ പരിശുദ്ധ കത്തോലിക്കാ സഭയുടെ ഹൈറാർക്കിക്കൽ സംവിധാനത്തിന് വിധേയരായി അജപാലന ശുശ്രൂഷകൾ നിർവ്വഹിക്കാൻ ചുമതലപ്പെട്ടവരാണ്.
• സഭാ സംവിധാനത്തിൻ്റെ നിയമസംഹിതയിൽ നിന്നുകൊണ്ട് ക്നാനായ കത്തോലിക്കാ സമൂഹത്തിന് ശുശ്രൂഷ നൽകുകയാണ് അവരുടെ ലക്ഷ്യം.

📌 നിലവിലെ സ്ഥിതി

നിലവിൽ യു.കെ. ക്നാനായ മിഷനുകളിൽ രജിസ്റ്റർ ചെയ്യുന്നതിലൂടെ കോട്ടയം അതിരൂപതാംഗത്വം നഷ്ടപ്പെടില്ല എന്ന് ഇരു രൂപതാധ്യക്ഷന്മാരുടെയും സർക്കുലറുകൾ ഉറപ്പു നൽകുന്നു. രൂപതയുടെ അഡ്മിനിസ്ട്രേഷൻ വിഭാഗം നിർദ്ദിഷ്ട രജിസ്ട്രേഷൻ ഫോമിന്റെ തുടർ നടപടികൾ Canonical, CIO & Legal ഡിപ്പാർട്ട്മെന്റുകളുടെ മറുപടിയും, ഓറിയന്റൽ കോൺഗ്രിഗേഷൻറെ നിർദ്ദേശങ്ങളും ലഭിക്കുന്നതിനനുസരിച്ച് അറിയിക്കാമെന്ന് ഉറപ്പുനൽകിയിട്ടുണ്ട്

ലിവര്‍പൂള്‍: യു.കെയില്‍ ക്‌നാനായക്കാര്‍ക്ക് ഒരു അജപാലന സംവിധാനം എന്ന സ്വപ്നസാക്ഷാത്കാരത്തിന്റെ ആദ്യ ചവിട്ടുപടിയായി നമുക്ക് സ്വന്തമായി ലഭിച്ച ഇടവക ദൈവാലയത്തോടനുബന്ധിച്ചുള്ള വൈദിക മന്ദിരത്തിന്റെ വെഞ്ചരിപ്പുകര്‍മ്മം ഗ്രേറ്റ് ബ്രിട്ടണ്‍ രൂപതാദ്ധ്യക്ഷന്‍ മാര്‍ ജോസഫ് സ്രാമ്പിക്കല്‍ നിര്‍വ്വഹിച്ചു. ജൂലൈ മാസം മൂന്നാം തീയതി മാര്‍ തോമ്മാശ്ലീഹായുടെ ദുക്ക്‌റാന തിരുനാള്‍ ദിവസം വൈകുന്നേരം 6 മണിക്ക് അവര്‍ ലേഡി ഓഫ് വാല്‍സിംഗ്ഹാം പള്ളിയില്‍ വച്ച് നടന്ന ആഘോഷമായ വി. കുര്‍ബാനയെ തുടര്‍ന്നാണ് നവീകരണപ്രവര്‍ത്തനങ്ങള്‍ പൂര്‍ത്തിയാക്കിയ ലിതര്‍ലന്റിലെ സെന്റ് പയസ് ടെന്‍ത് വൈദിക മന്ദിരത്തിന്റെ വെഞ്ചരിപ്പ് കര്‍മ്മം നടത്തപ്പെട്ടത്.

യൂറോപ്പില്‍ ആദ്യമായി ക്‌നാനായക്കാര്‍ക്കായി ഒരു ദൈവാലയവും അനുബന്ധ സൗകര്യങ്ങളും സ്വന്തമായി ലഭിച്ചതിന്റെ ആവേശത്തിലാണ് യു.കെയിലെ ക്‌നാനായ ജനത. ലിവര്‍പൂള്‍ ആര്‍ച്ച് ബിഷപ്പ് മാല്‍ക്കം മാക്മഹോനയുയുമായി യു.കെ ക്‌നാനായ കാത്തലിക് മിഷന്‍സ് കോ-ഓര്‍ഡിനേറ്റര്‍ ഫാ. സുനി പടിഞ്ഞാറേക്കരയുടെ നേതൃത്വത്തില്‍ ഡീക്കന്‍ അനില്‍, കൈക്കാരന്മാരായ ഫിലിപ്പ് കുഴിപ്പറമ്പില്‍, ജോയി പാവക്കുളത്ത് എന്നിവര്‍ നാളുകളായി നടത്തിയ ചര്‍ച്ചകളുടെ വെളിച്ചത്തിലും ഗ്രേറ്റ് ബ്രിട്ടണ്‍ രൂപതാദ്ധ്യക്ഷന്‍ മാര്‍ ജോസഫ് സ്രാമ്പിക്കല്‍ പിതാവിന്റെ അനുവാദത്താലുമാണ് 450-ല്‍ പരം ആളുകളെ ഉള്‍ക്കൊള്ളാന്‍ കഴിയുന്ന ദൈവാലയും 300-ല്‍ അധികം പേരെ ഉള്‍ക്കൊള്ളാന്‍ കഴിയുന്ന ഹാളും വൈദിക മന്ദിരവും ലഭിച്ചിരിക്കുന്നത്. യു.കെയിലെ വിവിധ ഭാഗങ്ങളില്‍ നിന്നായി മുന്നോറോളം പേര്‍ വെഞ്ചരിപ്പ് കര്‍മ്മത്തിന് സാക്ഷികളായി. നവീകരണ പ്രവര്‍ത്തനങ്ങള്‍ക്ക് ശേഷം സെന്റ് പയസ് ടെന്‍ത് ക്‌നാനായ കാത്തലിക് പള്ളിയുടെയും ഹാളിന്റെയും വെഞ്ചരിപ്പ് കര്‍മ്മം സെപ്റ്റംബര്‍ 20-ന് നടക്കും.

ബര്‍മിംഗ്ഹാം: ക്‌നാനായ കത്തോലിക്കാ മിഷനുകളുടെ ഫിസിക്കല്‍ നാഷണല്‍ മീറ്റ് ബര്‍മിംഗ്ഹാമിലെ കിംഗ്‌സ്‌ വിന്‍ഫോര്‍ഡിലുള്ള ഔർ ലേഡി ഓഫ് ലൂര്‍ദ്ദ് ദൈവാലയത്തില്‍ വച്ച് ഡിസംബര്‍ മാസം 14 ന് നടത്തപ്പെട്ടു. രാവിലെ 11 മണിക്ക് വി. കുര്‍ബാനയോടെ നാഷണല്‍ മീറ്റിന് തുടക്കമായി. സില്‍വര്‍ ജൂബിലി ആഘോഷിക്കുന്ന ബഹു. സജി തോട്ടത്തില്‍ അച്ചന്റെ മുഖ്യകാര്‍മ്മികത്വത്തില്‍ മിഷനുകളില്‍ സേവനം ചെയ്യുന്ന എല്ലാ ബഹു. വൈദികരും ചേര്‍ന്ന് അര്‍പ്പിച്ച വി. കുര്‍ബാനയെ തുടര്‍ന്ന് ജൂബിലി ആഘോഷിക്കുന്ന ബഹു. സജി അച്ചന്‍ കേക്ക് മുറിച്ച് ജൂബിലിയുടെ സന്തോഷം പങ്കുവച്ചു. തുടര്‍ന്ന് എല്ലാ വൈദികരും ചേര്‍ന്ന് ക്‌നാനായക്കാരുടെ വിവാഹ അവസരത്തില്‍ പാടുന്ന ബറുമറിയം ആലപിച്ചുകൊണ്ട് നാഷണല്‍ മീറ്റില്‍ സംബന്ധിക്കുന്നവര്‍ക്ക് ആശീര്‍വ്വാദം നല്‍കി. ഉദ്ഘാടനത്തിന് ശേഷം ഡീക്കന്‍ അനില്‍ ലൂക്കോസ് നയിച്ച ക്ലാസ്സ് ആനുകാലിക വിഷയങ്ങളും സഭയും സമുദായവും എങ്ങനെ പരസ്പരം ബന്ധപ്പെട്ടിരിക്കുന്നു എന്ന കാര്യവും ചര്‍ച്ച ചെയ്തു. ലഞ്ചിനു ശേഷം ചേര്‍ന്ന നാഷണല്‍ മീറ്റില്‍ യു.കെയിലെ മിഷനുകളുമായി ബന്ധപ്പെട്ട കാര്യങ്ങളില്‍ ചര്‍ച്ചകള്‍ നടന്നു. വിവിധ ഗ്രൂപ്പുകളായി തിരിഞ്ഞ് വിവിധ വിഷയങ്ങളില്‍ ചര്‍ച്ചകള്‍ നടത്തുകയും ഒരോ ഗ്രൂപ്പില്‍ നിന്നും തിരഞ്ഞെടുക്കപ്പെട്ട സെക്രട്ടറിമാര്‍ അതാത് ഗ്രൂപ്പിനെ പ്രതിനിധീകരിച്ച് ആശയങ്ങള്‍ അവതരിപ്പിക്കുകയും ചെയ്തു. തുടര്‍ന്ന് നടന്ന പൊതു ചര്‍ച്ചയ്ക്ക് കോ-ഓര്‍ഡിനേറ്റര്‍ ഫാ. സുനി പടിഞ്ഞാറേക്കര നേതൃത്വം നല്‍കി. 4 മണിക്ക് പ്രാര്‍ത്ഥനയോടെയും സമാപന ആശീര്‍വ്വാദത്തോടെയും നാഷണല്‍ മീറ്റ് അവസാനിച്ചു. വിവിധ മിഷനുകളില്‍ സേവനം ചെയ്യുന്ന ബഹു. വൈദികര്‍, കൈക്കാരന്മാര്‍, അക്കൗണ്ടന്റ്‌സ്, ഹെഡ് ടീച്ചേഴ്‌സ് എന്നിവര്‍ ഉള്‍പ്പെടെ 55 ഓളം പേര്‍ നാഷണല്‍ മീറ്റില്‍ സംബന്ധിച്ചു.

കത്തോലിക്കാ വിശ്വാസത്തിലും ക്നാനായ സമുദായ സ്നേഹത്തിലും ഒരുമിച്ച് ഒരു ജനമായി മുന്നേറുന്ന ക്നാനായ കാത്തലിക് മിഷനുകളിൽ നടത്തപ്പെടുന്ന വിവിധ പ്രവർത്തനങ്ങൾ ഏവരിലും എത്തിക്കുന്നതിനും സഭാ സമുദായ വാർത്തകൾ നിഷ്പക്ഷമായും സത്യസന്ധമായും അവതരിപ്പിക്കുന്നതിനുമായി ക്നാനായ കാത്തലിക് മിഷൻസ് യു.കെയുടെ മുഖപത്രമായി ഇനിമുതൽ തെക്കൻ ടൈംസ് എന്ന ബുള്ളറ്റിൻ ആരംഭിക്കുന്നു. 2024 ഡിസംബർ മാസം മുതൽ മാസത്തിൽ രണ്ട് പ്രാവശ്യം വീതമാണ് ഇത് പ്രസിദ്ധീകരിക്കുന്നത്. വിജ്ഞാനപ്രദമായ ലേഖനങ്ങൾ, സമുദായ ചരിത്ര പഠനങ്ങൾ, യു.കെയിലെ ക്നാനായ മിഷനുകളിൽ നടത്തപ്പെടുന്ന വിവിധ പ്രവർത്തനങ്ങൾ, വിവിധ ഭക്ത സംഘടകളുടെ പ്രവർത്തനങ്ങൾ, ആഗോള സഭാവാർത്തകൾ, ദൈവശാസ്ത്രപരമായ ലേഖനങ്ങൾ, ബൈബിൾ പഠനങ്ങൾ, യുവജനങ്ങൾക്കും കുട്ടികൾക്കുമായുള്ള പംക്തികൾ എന്നിവ ഉൾപ്പെടുത്തിയാണ് ഫോർട്നൈറ്റ്ലി ബുള്ളറ്റിൻ നിങ്ങളിലേയ്ക്ക് എത്തുന്നത്.

കൂടാതെ വൈവാഹിക പരസ്യങ്ങൾ, മരണ വാർഷികങ്ങൾ, വിവാഹ വാർഷികങ്ങൾ എന്നിവയും തെക്കൻ ടൈംസിലൂടെ പ്രസിദ്ധീകരിക്കുന്നതാണ്. ഫാ. സുനി പടിഞ്ഞാറേക്കര മാനേജിംഗ് ഡയറക്ടറായും ഫാ. മാത്യൂസ് വലിയപുത്തൻപുരയിൽ ചീഫ് എഡിറ്ററായും സക്കറിയ പുത്തൻകളം ന്യൂസ് എഡിറ്ററായും ലിജു കാരുപ്ലാക്കിൽ, ബിജു പന്നിവേലിൽ എന്നിവർ ഡിസൈനേഴ്സായും എബി നെടുവാമ്പുഴ, സോജൻ തോമസ്, ജോജോ മേലേടം, ടൈസ് പറമ്പേട്ട് എന്നിവർ സബ് എഡിറ്റേഴ്സായും പ്രവർത്തിക്കുന്ന ഒരു ടീമാണ് ബുള്ളറ്റിന്റെ എഡിറ്റോറിയൽ ബോർഡായി പ്രവർത്തിക്കുന്നത്. കൂടാതെ അതാത് മിഷൻ പ്രവർത്തനങ്ങൾ ക്രോഡീകരിക്കുന്നതിന് 15 മിഷനുകളിൽ നിന്നുള്ള റിപ്പോർട്ടേഴ്സിന്റെ ഒരു ടീമും ഇതോട് ചേർന്ന് പ്രവർത്തിക്കുന്നു. ക്നാനായ മിഷനുകളിലെ വിവിധ വ്യക്തികളിൽ നിന്നും നിർദ്ദേശിക്കപ്പെട്ട 89 പേരുകളിൽ നിന്നാണ് തെക്കൻ ടൈംസ് എന്ന പേര് ബുള്ളറ്റിന് സ്വീകരിച്ചത്. ആരാധന ക്രമവത്സരത്തിൽ പുതിയ ഒരു വർഷത്തിലേയ്ക്ക് പ്രവേശിക്കുന്ന മംഗളവാർത്താക്കാലത്തിന്റെ ആരംഭം മുതൽ തെക്കൻ ടൈംസ് നിങ്ങളിലേയ്ക്ക് എത്തുന്നു. നിസീമമായ സഹകരണവും ക്രിയാത്മകമായ നിർദ്ദേശങ്ങളും നൽകി സഹകരിക്കുമല്ലോ.

യുകെ ക്‌നാനായ കാത്തലിക് മിഷനുകളുടെ നേതൃത്വത്തിൽ ക്‌നാനായ യുവതീയുവാക്കൾക്കായി പ്രീ മാര്യേജ് കോഴ്‌സ് നടത്തപ്പെട്ടു. വിവാഹജീവിതത്തിനു വേണ്ടി ഒരുങ്ങുന്ന 32 യുവതീയുവാക്കളാണ് മാക്ളസ്ഫീൽഡിലുള്ള സാവിയോ ഹൗസിൽ വച്ച് മാർച്ച് 7 മുതൽ 9 വരെ നടത്തപ്പെട്ട പ്രീമാര്യേജ് കോഴ്‌സിൽ പങ്കെടുത്തത്. യുകെയിലെ ക്നാനായ കത്തോലിക്കാ കുടുംബങ്ങളുടെ ആത്മീയ വളർച്ചക്കു വേണ്ടി സ്ഥാപിതമായ ഫാമിലി അപ്പൊസ്‌റ്റോലേറ്റിന്റെ നേതൃത്വത്തിലാണ് കോഴ്‌സ് നടത്തപ്പെട്ടത്.

ക്രൈസ്‌തവ വിശ്വാസത്തിലൂടെയും കൗദാശിക ജീവിതത്തിലൂടെയും ഈ ആധുനിക കാലഘട്ടത്തിൽ വിവാഹജീവിതം നേരിടുന്ന വെല്ലുവിളികളെ എങ്ങനെ അതിജീവിക്കാം എന്നതിനെ കുറിച്ചും, ദമ്പതികൾ തമ്മിലുള്ള പരസ്‌പര സ്നേഹത്തിലൂടെ വിവാഹജീവിതത്തെ എങ്ങനെ ഒരു സ്വർഗ്ഗീയ അനുഭമാക്കി മാറ്റം എന്നതിനെക്കുറിച്ചും വിവിധ വിഷയങ്ങളിൽ ക്ലാസുകൾ നടത്തപ്പെട്ടു. അതോടൊപ്പം വിവാഹജീവിതവുമായി ബന്ധപ്പെട്ട വിവിധ വിഷയങ്ങളെ സംബന്ധിച്ചു നടത്തപ്പെട്ട കൂട്ടായ ചർച്ചകളും, ക്‌നാനായ സമുദായത്തിന്റെ ഭാവി എങ്ങനെ കത്തോലിക്കാ കുടുംബങ്ങളിലൂടെ സുരക്ഷിതമാക്കാം എന്ന വിഷയത്തിൽ നടത്തിയ ക്ലാസുംഏറെ പ്രയോജനകരമായിരുന്നുവെന്ന് കോഴ്‌സിൽ പങ്കെടുത്തവർ ഒന്നടങ്കം അഭിപ്രായപ്പെട്ടു.

ഫാമിലി അപ്പൊസ്‌റ്റോലേറ്റിന്റെ ഡയറക്ടർ ഫാ. ജിൻസ് കണ്ടക്കാട്ടിന്റെ നേതൃത്വത്തിൽ ഫാ. തോമസ് മുളവനാൽ, ഫാ. ഷഞ്ചു കൊച്ചുപറമ്പിൽ, ഫാ. മാത്യൂസ് വലിയപുത്തൻപുരയിൽ, ഫാ. ജോഷി കൂട്ടുങ്കൽ, ഷാജി ചരമേൽ, റോയി സ്റ്റീഫൻ കുന്നേൽ, ജോണി മാത്യു, ഷെറി ബേബി, മേബിൾ അനു, സോജി ബിജോ, മിലി രഞ്ജി, ആൻസി ചേലക്കൽ, സിജിമോൻ സിറിയക്ക്, ഡീക്കൻ അനിൽ ലൂക്കോസ് എന്നിവർ ക്ലാസുകൾ നയിച്ചു.

കോട്ടയം അതിരൂപതയുടെ തലപ്പള്ളിയായ കടുത്തുരുത്തി വലിയ പള്ളിയിൽ പരമ്പരാഗതമായി നടന്നു വരാറുള്ള പുറത്ത് നമസ്കാരം ക്നാനായ കാത്തലിക് മിഷൻ യുകെയുടെ നേതൃത്വത്തിൽ ഭക്തിസാന്ദ്രമായി ആചരിച്ചു. ലിവർപൂളിലെ അവർ ലേഡി ഓഫ് പീസ് കാത്തലിക് ചർച്ചിൽ രാവിലെ മുതൽ തീർത്ഥാടകർ പ്രവാഹമായിരുന്നു.

ജനുവരി 27, ശനിയാഴ്ച UK യിലെ 15 ക്നാനായ കാത്തലിക് മിഷനുകൾ ഒന്നു ചേർന്ന് ലിവർപൂളിൽ നടത്തിയ പുറത്തു നമസ്കാരത്തിൽ വച്ച് ഏപ്രിൽ 20-ന് നടക്കുന്ന കുടുംബ സംഗമം -വാഴ്‌വ് 2024- തിനുള്ള ടിക്കറ്റ് കിക്ക് ഓഫ് ചെയ്തു.

ഏകദേശം ഒരു മാസത്തെ യു കെ സന്ദർശത്തിനായി എത്തുന്ന കോട്ടയം അതിരൂപത സഹായ മെത്രാൻ മാർ ജോസഫ് പണ്ടാരശ്ശേരി പിതാവിന് ഗ്രേറ്റ് ബ്രിട്ടൻ സീറോ മലബാർ രൂപത വികാരി ജനറാളും ക്നാനായക്കാരുടെ അധിക ചുമതലയുള്ള വികാരി ജനറാളുമായ ഫാദർ സജി മലയിൽ പുത്തൻപുരയുടെയും സെൻമേരിസ് ക്നാനായ കാത്തലിക് മിഷൻ ആൻഡ് സെൻറ് പയസ് ടെൻത് ക്നാനായ കാത്തലിക് മിഷൻ അസിസ്റ്റൻറ് ഡയറക്ടർ ഫാദർ അജൂബ് തൊട്ടനാനിയിൽ എന്നിവരുടെ നേതൃത്വത്തിൽ മാഞ്ചസ്റ്റർ സെൻറ് മേരീസ് ക്നാനായ കാത്തലിക് മിഷൻ ആൻഡ് ലിവർപൂൾ സെൻറ് പയസ് ടെൻത് ക്നാനായ കാത്തലിക് മിഷൻ കൈകാരന്മാരുടെയും പാരീഷ് കൗൺസിൽ അംഗങ്ങളുടെയും വേദപാഠ പ്രതിനിധികളും ഉൾപ്പെട്ട ക്നാനായ കാത്തലിക് മിഷൻ അംഗങ്ങൾ പ്രൗഢോജിതമായ സ്വീകരണമാണ് മാർ ജോസഫ് പണ്ടാരശ്ശേരി പിതാവിനെ എയർപോർട്ടിൽ നൽകിയത്.
യുകെയിലെ ക്നാനായ കാത്തലിക് മിഷൻ ഇടവകകൾ സന്ദർശിക്കുന്നതിനും കുടുംബങ്ങളെ പരിചയപ്പെടുന്നതിനും മിഷൻ പ്രവർത്തനങ്ങളെ പ്രോത്സാഹിപ്പിക്കുന്നതിന് വേണ്ടിയാണ് മാർ ജോസഫ് പണ്ടാശരി പിതാവ് യുകെയിൽ സന്ദർശനം നടത്തുന്നത്. നാളെ ലിവർപൂൾ മാഞ്ചസ്റ്റർ എന്നിവിടങ്ങളിലെ ക്നാനായ കാത്തലിക് മിഷൻ ഇടവകകളിൽ ദിവ്യബലി അർപ്പിക്കുകയും സ്വീകരണ പരിപാടികളിലും കുടുംബങ്ങളെ പരിചയപ്പെടുന്നതിനും തുടക്കമാകും. ഡിസംബർ 9ന് നടത്തപ്പെടുന്ന ക്നാനായ കാത്തലിക് മിഷൻ യുകെയുടെ പ്രതിനിധി സമ്മേളനത്തെ അഭിവന്ദ്യ മാർ ജോസഫ് പണ്ടാരശ്ശേരി പിതാവ് അഭിസംബോധന ചെയ്തു സംസാരിക്കും അഭിവന്ദ്യ കൊച്ചു പിതാവിനെ മിഷൻ ഇടവകകളിൽ സ്വീകരിക്കുവാൻ വൈദികരുടെ നേതൃത്വത്തിൽ വിപുലമായ ഒരുക്കങ്ങളാണ് നടന്നുവരുന്നത് ഡിസംബർ 17ന് ഹോളി ഫാമിലി ക്നാനായ കാത്തലിക് മിഷൻ സ്കോട്ലാൻഡിൽ ആയിരിക്കും സന്ദർശന പരിപാടികളുടെ സമാപനം.